Desmontando un prexuízo

A peza de humor gráfico anterior axuda a reflexionarmos sobre un difundido prexuízo lingüístico: «É de mala educación falar en galego con que se dirixe a nós en castelán». 

Reflexionemos un chisco sobre esta idea:

Máis alá do caso de persoas estranxeiras que descoñecen a nosa lingua, deamos por feito que en Galicia a poboación é bilingüe. Se partimos da base, de acordo co prexuízo anterior, de que un galegofalante debe cambiar ao castelán se alguén se dirixe a el nesta lingua, podemos chegar a algunhas conclusións sorprendentes cunha sinxela análise matemática.

Imaxinemos dúas situacións en que interactúan catro persoas, aplicando o prexuízo que nos ocupa.

Caso A. 2 persoas que falan habitualmente en galego e 2 que falan habitualmente en castelán. 

Caso B. 3 persoas que falan habitualmente en galego é 1 que o fai en castelán.

Conclusión: no caso A (cun 50% de galegofalantes) os actos de fala en galego serían o 16,7%, no caso B (cun 75% de galegofalantes) os actos de fala en galego serían o 50%.

Daquela, pódese dedúcese que:

«Se os galegofalantes cambian sempre ao castelán cando alguén lles fala castelán, o galego perde espazos de uso mesmo entre persoas que saben galego.»

Os nosos cómics

Estamos rematando o curso e un dos nosos últimos proxectos foi elaborar cómics. Previamente estudamos as técnicas e recursos propios desta arte: os tipos de planos, os tipos de globos, as onomatopeas, as liñas cinéticas... 

Moitos foron os traballos presentados. Aquí deixamos unha pequena selección dos mellores. Parabéns a todos!!!

ç

Preparando os maios (IV)

E por fin rematamos o proxecto da celebración dos maios. Un gran traballo compartido por profesorado de distintas materias (Plástica, Lingua Galega, Música...) e por todo o alumnado de Primaria. Unha experiencia que nos aproximou de forma lúdica e significativa a unha das tradicións populares máis importantes de Galicia.

O ano que vén máis!

Compartindo cultura galega e xaponesa con Haruna

Coincidindo co Mes do Xapón e coa Semana das Letra Galegas, tivemos a gran sorte de contar coa visita de Haruna Chatani. Foron sesións cheas de información, música, contos, conversas e anécdotas. Haruna contounos como viaxou por moitos lugares do mundo, como chegou a Galicia, como a enfeitizou a nosa cultura e a nosa lingua, como se escribe en xaponés, como se debuxa a Doraemon... 

Tamén nos narrou en galego o conto tradicional xaponés de Momótaro, o neno pexego, e cantou connosco a canción dos Maios. 

Unha experiencia única que, sen dúbida, quedará gravada na nosa memoria! Graciñas, Haruna!

17 de maio para Begoña Caamaño

Un ano máis estamos coa gran festa das Letras Galegas. Nesta ocasión, de novo, con protagonismo feminino: a viguesa Begoña Caamaño (1964-2014). A pesar de falecer moi nova, Begoña foi unha das voces con máis forza das nosas letras neste comezo do século XXI. Narradora, xornalista, activista de diferentes causas..., a súa figura ben merece a homenaxe colectiva que supón o Día das Letras Galegas.

Para coñecela mellor, aquí tes este breve vídeo.

Se queres aprender máis sobre Begoña Caamaño (con actividades, xogos...), pode serche de axuda esta ligazón ou estoutra.

E, por último, un clásico por estas datas: o autodefinido Begoña Caamaño. Anímate a resolvelo, se o fas con axuda, incluso mellor.

Preparando os maios (III)

E grazas á vosa colaboración, xa temos a letra do noso maio. Lista para que a aprendamos e a ensaiemos. Adiante!

Preparando os maios (II)

As estrofas máis típicas dos maios son as coplas: conxunto de catro versos de 8 sílabas que riman 8 -, 8 a, 8 - 8 a. É dicir, a copla ten rima (asonante ou consonante) nos versos pares. Por exemplo:

Heiche de contar historias,    8 – 

heiche de cantar copriñas,     8 a 

heiche de tocar as cunchas,   8 –  

miña carrapucheiriña.           8 a

 Aquí temos un exemplo de como poderían ser as letras da celebración dos maios.

Tendo en conta isto, anímate a compoñer outras coplas para ampliar o noso maio.