21 Días En Galego: Mañá comezamos!

Como sabedes, un dos traballos voluntarios en 3ESO para este terceiro trimestre é «21 Días En Galego». Os pioneiros neste proxecto foron rapaces e rapazas do IES da Pobra do Caramiñal, que xa levan catro anos participando. Conscientes de que moitos de vós non tedes o galego como lingua habitual e seguindo o ronsel do alumnado do instituto da Pobra, convidámovos a desenvolver en galego a vosa vida cotiá (na casa, no centro, na rúa...) durante 21 días e valorar esa experiencia. 

Lembrade que perseguimos dous obxectivos principais: 

• Mellorar a nosa expresión oral.
• Provocar a reflexión persoal sobre a nosa relación co idioma galego.

Como seguimento diario, propoñémosvos actividades orais de dous tipos, que serán necesariamente gravadas en vídeo.

— «Como che vai?» (días impares). Consiste en facer unha gravación, cun mínimo de 3 minutos de duración, comentando como levades a experiencia: sensacións, dificultades do día a día, reaccións dos que vos rodean (se vos axudan, se vos cuestionan...)
— «O reto» (días pares). Tamén mediante unha gravación dun mínimo de 3 minutos, debedes de contestar oralmente a tarefa que se vos propoña: reflexionar sobre un tema, entrevistar unha terceira persoa, comentar un libro, pronunciar uns trabalinguas...

Día a día iremos dando as instrucións necesarias sobre estas actividades aquí, en Achaveeomundo, e as vosas gravacións serán recollidas semanalmente.

Moitos de vós xa anunciastes que iades participar... e mañá comezamos! Unha última axuda: a curtametraxe que María e Antía (dúas alumnas do Fogar) fixeron no 2014 a partir do relato «Instrucciones para aprender a hablar gallego», de Made in Galiza de Séchu Sende.

Seguro que algún consello pode servos útil! Ánimo!

Encontro con Manuel Rivas

O pasado 6 de abril celebrouse no salón de actos do centro un encontro do alumnado de Bacharelato con Manuel Rivas, sobranceiro escritor coruñés.

De inicio, a alumna Cristina Mouriño lembrou a traxectoria profesional do autor desde os seus inicios como xornalista ata a súa faceta como poeta, ensaísta, académico e narrador.

Pola súa parte, Rivas realizou unha alocución sobre a importancia da palabra e da literatura desde o seu nacemento e conservación na tradición oral ata as súas distintas manifestacións escritas. Asemade, comentou aspectos como o motivo e a inspiración do libro As voces baixas que, nesta ocasión, viña de ler o alumnado; momento en que se produciu un pequeno coloquio entre escritor e discentes.

No remate, o escritor asinou e dedicou algúns exemplares de distintas obras súas.

O ano de Carlos Casares [2]

O vídeo anterior serve para nos aproximar a figura humana e literaria de Carlos Casares, autor ao que se lle dedica o Día das Letras deste ano, como vimos hai pouco.

Hoxe ofrecémosvos unhas cantas ligazóns que reúnen recursos variados para coñecerdes mellor este ilustre escritor ourensán.

http://www.aelg.org/centro-documentacion/autores-as/carlos-casares
Ficha de Carlos Casares na web da AELG (Asociación de Escritores en Lingua Galega), cunha biografía, coa presentación da súa obra completa, con críticas e recensións delas...

http://primaveradasletras.gal
Espazo creado pola Real Academia Galega e dedicado ao autor, co gallo do Día das Letras Galegas. Con unidades didácticas, recursos interactivos en liña, certames literarios...

http://fundacioncarloscasares.org
Na web da Fundación Carlos Casares ofrecen, desde material audiovisual (fotografías, audios e vídeos), ata recursos didácticos (webquests, unidades didácticas, guías de lectura da súas obras...).

E un agasallo final: unha versión cantada do seu libro A galiña azul co ritmo da célebre coreografía dos vasos. Un gran traballo dos rapaces e rapazas do IES Carlos Casares de Vigo.

De novo, campións de debate!

A semana pasada celebrouse na nosa cidade o II Torneo de Debate Talkk da Coruña, en colaboración coa Fundación Barrié.

Tras vencer a outros colexios en oitavos, cuartos e semifinais, o equipo Fogar I do colexio Fogar de Santa Margarida proclamouse campión nun apaixonante debate final no que tivo que enfrontarse á Compañía de María, centro académico gañador da anterior edición. 

Os nosos equipos, formados por alumnado de 1º Bacharelato (Alba Boedo, Nerea Castiñeira, Diego Pampín, Lucía Sánchez e María Señarís –Fogar 1– e Cristina Mouriño, Antía Otero, Sara Sánchez e Icía Varela –Fogar 2–), fixéronnos vivir unhas xornadas apaixonantes e cheas de emoción, conseguiron que vibraramos coa paixón do seu discurso e enchéronnos de orgullo co seu derroche de seguridade, o seu compañeirismo, o seu excelente traballo en equipo, a súa humildade e, por suposto, a súa fantástica capacidade comunicativa.

Os días 30, 31 de xaneiro e 1 de febreiro, celebráronse as fases preliminares, nas que os 19 equipos participantes de diferentes colexios da cidade, puxeron en práctica todo o traballado e investigado para facerse cun posto o día da final, o 3 de febreiro. 

A pregunta sobre a que todos os equipos de debate tiveron que investigar, informarse e prepararse para a «loita» dialéctica foi a seguinte: «Debe España apostar por un sistema educativo sen materias nin horarios fixos?» Os participantes tiñan que preparar tanto a postura A FAVOR como EN CONTRA, xa que, ata o mesmo momento do comezo de cada debate, no que se abre o sobre do sorteo, non saben que postura lles tocaría defender.

Un agradecemento especial, tamén, para Carolina Gabín, Xosé Manuel Varela e demais profesores que, coa súa guía e axuda, contribuíron a este logro, que se suma aos dos anos anteriores.

O Fogar pola Paz

O REINO
No tempo aquel,
cando os animais falaban,
dicir liberdade non era triste,
dicir verdade era coma un río,
dicir amor, dicir amigo,
era igual que nomear a primavera.
Ninguén sabía dos aldraxes.
Cando os animais falaban,
as persoas cantaban nos solpores
pombas de luz e xílgaros de soños.
Dicir teu e meu non se entendía,
dicir espada estaba prohibido,
dicir prisión sómente era unha verba sen senso
un aire que mancaba o corazón da xente.
Cando,
cando se perdeu, este gran Reino?
                                                                      Celso Emilio Ferreiro, Longa noite de pedra.

O Fogar de Santa Margarida pola Paz, a Solidariedade e a Non-Violencia

Os nosos foto-haikus

Judith Pedreira (3ESO-C)

Jorge Nolasco (3ESO-B)

Gema Novo (3ESO-A)

O pasado 11 de decembro lanzamos o reto lúdico dos foto-haikus. A rapazada de terceiro da ESO respondeu á proposta e foron chegando diversas pezas cheas de inspiración. Lembrade: un haiku é un tipo de poema que en só 17 sílabas (5 + 7 + 5) encerra a esencia dun momento, dunha experiencia, dun sentimento. A este texto tiñan que engadirlle unha imaxe que o ilustrase. 

De entre todos os foto-haikus, seleccionamos 3 gañadores, «ex aequo», que encabezan a entrada. Deseguido, os demais. Todo eles de gran mérito. Parabéns a todos os participantes!

Alejandro Ramos (3ESO-A)

Antía García (3ESO-B)

Carlota Vázquez (3ESO-A)


Iria Otero (3ESO-A)

Eva Castro (3ESO-B)

Laura Mella (3ESO-A)

Diego Ferreiro (3ESO-B)

Laura Ponte (3ESO-A)

Miguel Rodríguez (3ESO-A)

Nerea Rodríguez (3ESO-B)

Gabriela Taboada (3ESO-A)

O ano de Carlos Casares [1]

Estamos xa no 2017! O Día das Letras deste ano homenaxearemos a Carlos Casares Mouriño (1941-2002), un autor de gran talento literario que destacou especialmente pola súa obra narrativa: Vento ferido (1967), Xoguetes para un tempo prohibido (1975), Ilustrísima (1980), Os escuros soños de Clío (1979), Os mortos daquel verán (1987)... Mais tamén por moitas outras facetas:

• Escribiu obras dedicadas aos máis pequenos: A galiña azul (1968), As laranxas máis laranxas de todas as laranxas (1973)...

• Foi o primeiro tradutor ao galego d’O principiño de Antoine de Saint-Exupéry. Obra que admiraba fondamente e da que posuía exemplares en máis de 60 linguas distintas.

• Foi un prolífico coladorador en prensa. A súa columna de opinión «Á marxe», en La Voz de Galicia, mantivose activa desde 1992 ata o seu falecemento.

• Foi director xeral da Editorial Galaxia. 

• Foi deputado, no ano 1981, no primeiro Parlamento Galego co PSdeG-PSOE.

Axiña volveremos con máis comentarios dedicados a este autor emblemático da nosa literatura da segunda metade do século XX. De momento, aquí deixamos este vídeo para coñecérmolo mellor.