O ano de Manuel María [4]

 

Gran traballo de Paula Ramos Pan, alumna de 3º da ESO. Velaquí tedes o seu Prezi dedicado a Manuel María, o autor homenaxeado este ano no Día das Letras Galegas, como subliña a propia Paula, polo seu «compromiso inquebrantable» coa lingua galega. 

Un completo resumo da súa biografía e tres poemas: «Terra Chá», «O pobo que deixa perder a súa palabra» e «O arado». Os dous primeiros recitados polo propio Manuel María e o terceiro coa versión musicada de Fuxan os Ventos. 

Parabéns, Paula!

O ano de Manuel María [3]

O anterior é un sinxelo videopoema elaborado pola moza María Cal García. O texto orixinal é o poema «A estrela sen nome» de Manuel María, publicado no seu libro Os soños na gaiola (1972).

Un videopoema é unha técnica expresiva que permite enriquecer un texto poético a través de medios audiovisuais. O habitual é gravar un audio coa recitación do poema en cuestión. Logo incorpórase ese audio a un vídeo no que se van sucedendo imaxes alusivas ao contido dos versos, que aparecen a xeito de subtítulos. Ademais acostuma engadirse algún fondo musical, acaído ao ton do poema. É habitual, encabezar o vídeo co nome do poema, do autor/a e da obra en que foi publicado; e tamén pechalo cos datos do autor/a do videopoema.

Manuel María, o homenaxeado no Día das Letras Galegas deste ano, é un dos poetas máis recitados e musicados da nosa literatura contemporánea. Pola rede circulan unha chea de poemas seus que foron transformados en cancións (podes comprobalo aquí ou aquí) ou convertidos noutros videopoemas.

Gozade, por exemplo, deste fermoso videoclip da canción «A rebelión das ovellas», que o músico Manuel R. Crespo creou a partir do poema «Conto de medo» de Manuel María.

Proposta de traballo (3º ESO):

Quen se anima a crear videopoemas a partir de textos de Manuel María? Debedes seguir as indicacións anteriores. Podedes seleccionar o poema que máis vos guste, por exemplo, neste blog. É posible facelo en grupos e utilizar calquera programa acaído para a edición de vídeo (Powerpoint, Windows Movie Maker...)

O ano de Manuel María [2]

Van chegando os traballos! E o primeiro, un vídeo dedicado a Manuel María, o autor homenaxeado este ano no Día das Letras Galegas. Unha peza audiovisual elaborada por Lucía Rodríguez Bouza, alumna de 3ESO. 

Como vedes, despois de presentarnos a figura literaria deste polifacético escritor da Terra Chá, Lucía animouse a facer a recitación de «A fala», un dos seus poemas máis coñecidos, que ademais serviu para lle dar nome a este blog. 

Mérito ten: investigar, recadar e organizar a información; e, despois, editar o vídeo sincronizando imaxes, texto e audio. E a música de fondo, poemas de Manuel María fermosamente musicados por Mini e Mero.

Graciñas Lucía, o teu vídeo tamén axudará a darlles a coñecer a Manuel María aos máis pequenos do cole.

O ano de Manuel María

Comeza o 2016 e, con todos vós, Manuel María Fernández Teixeiro (1929-2004), o homenaxeado nas Letras Galegas deste ano. Trátase dun dos escritores máis importantes da literatura galega na segunda metade do século XX. Non houbo xénero literario que non cultivase: narrativa, teatro, ensaio, xornalismo e, sobre todo, poesía.

Como poeta, Manuel María considerou todos os temas humanos apropiados para a arte poética: a reivinciación social, a defensa da nosa cultura, o canto á súa paisaxe natal da Terra Chá, o paso do tempo e da vida ou, como vemos no poema, os sentimentos máis íntimos (como amor).

Rosas
SEMPRE a rosa. Sempre:
a forma,
a cor,
o recendo,
a luz,
a perfección da rosa.
Prefiro a rosa vermella.
E amo a rosa branca
porque, cando lle digo
simplesmentes: ROSA,
entrecerra os ollos,
treme
e ruborece.

Manuel María, A luz resuscitada (1984)

Aínda que xa o fixemos nunha entrada anterior, aquí vos quedan varias ligazóns de interese para achegarvos á vida e á obra de Manuel María.

Casa Museo Manuel María
Manuel María no Centro de Documentación da AELG
Manuel María na Wikipedia en galego

Aproveitamos para vos presentar o vídeo de promoción de Canta o cuco, un novo libro-disco de Magin Blanco e Uxía Senlle no que poñen todo tipo de ritmos musicais a versos do poeta da Terra Chá. Unha fermosa forma de achegar a súa obra aos máis pequenos.

E non esquezas, como explicamos na primeira entrada, que son tamén seus os versos que lle deron nome ao noso blog: «A lingua é a chave coa que abrimos o mundo».

Proposta de traballos para 3º ESO

Chega o tempo de propoñer traballos. Xa sabedes, son voluntarios e podedes optar por calquera destas opcións. E axudarán a subir algo as notas!

A. Gravardes recitacións de poemas de Manuel María. Chega o ano 2016, cuxo Día das Letras Galegas estará dedicado a Manuel María Fernández Teixeiro, un dos poetas máis profíficos da nosa literatura. Suxerímosvos que seleccionedes os poemas del que máis vos gusten e que fagades recitacións. Podedes gravalas simplemente en audio (en Ivoox, por exemplo). Como esta.
Ou facerdes unha videomontaxe (Windows Movie Maker, iMovie...) con planos de detalle das vosas bocas mentres recitades. Como aquí.

B: Preparardes unha presentación en Prezi, programa en liña gratuíto. Ben lucida, por suposto: non só con texto, senón tamén con imaxes, audio, vídeo... O contido, escollédeo vós. Por exemplo: algo sobre o devandito Manuel María ou sobre algún tema que vós interesase do estudado no primeiro trimestre (as cantigas de amigo e de amor, a orixe e formación da lingua galega, a tipoloxía textual...). Reparade nestes exemplos, feitos por outros compañeiros vosos.

C: Facerdes recensións ou críticas literarias d’O achado do castro, de Manuel Núñez Singala. Como xa lemos esa comedia, agora podedes, de acordo co suxerido na entrada anterior, facer un comentario persoal sobre a obra. Debe axustarse ás pautas indicadas e redactarse en Word (mínimo 25 liñas).

D: Escribirdes descricións de persoas. Preferiblemente retratos (descricións que combinan trazos físicos e estéticos con trazos psicolóxicos e de personalidade). Para lle dar un toque orixinal, debedes escoller un dos persoeiros ficticios desta ligazón. Cun chisco de imaxinación, cada figura pode suxerir unha chea de ideas para creardes un bo retrato. Tamén cómpre presentalo en Word (mínimo 25 liñas).

Calquera das catro posibilidades é válida. Os traballos das opcións A e B poden elaborarse de forma individual ou en grupo. Como vedes, son traballos acordes cos tempos, en formato dixital e/ou audiovisual, que poderán despois expoñerse neste blog. De terdes outras ideas, comentádeo.

Bota a andar «A chave e o mundo»

A fala

O idioma é a chave
coa que abrimos o mundo:
o salouco máis feble,
o pensar máis profundo.

O idioma é a vida,
o coitelo da dor,
o murmurio do vento,
a palabra de amor.

O idioma é o tempo,
é a voz dos avós
e ese breve ronsel
que deixaremos nós.

O idioma é un herdo,
patrimonio do pobo,
maxicamente vello,
eternamente novo.

O idioma é a patria,
a esencia máis nosa,
a creación común
meirande e poderosa.

O idioma é a forza
que nos xungue e sostén.
Se perdemos a fala
non seremos ninguén!

O idioma é o amor,
o latexo, a verdade,
a fonte que agroma
a máis forte irmandade.

Renunciar ao idioma
é ser mudo é morrer.
Precisamos a lingua
se queremos vencer! 

                         Manuel María

Un poema que nos fala do noso idioma, de nós e do noso lugar no mundo. Un poema que serviu para lle dar un título e un lema a este blog. A través del intentaremos divulgar, coa vosa colaboración, todas actividades e proxectos que se vaian desenvolvendo no Fogar arredor da lingua e da literatura galegas. 

Como ben di Manuel María, coa nosa lingua podemos abrir o mundo: todas as portas, todas as fiestras... E aí vai unha primeira proba: Queres traducir ao galego calquera palabra ou texto en castelán, catalán, inglés ou francés? Queres saber como se di nun deses idiomas algo que está en galego? Aquí tes a ligazón de TradutorGalego, unha app gratuíta para dispositivos móbiles. Unha ferramenta de primeira, para un idioma de primeira, en pleno século 21.